Transcription
1
Messieurs, le Xe de ce mois, jay receu votre depeche du XXVIIme. Le VIme, javois receu par monsieur
2
d’Eveynes vos memoires semblables à celles de vostredite depeche ; et avoir desià dressé le cayer que dudit
3
jour Xme fut presenté au roy et remis par sa majesté à monsieur levesque de Limoges pour luy en faire son rapport, je
4
y ay reprins tous les poinctz pourtés par lesdits memoires ; assavoir de pourvoir premierement
5
à lestat du païs ou par paix ou par une guerre non languissante et attendant ce quil adviendroit
6
du traicté où lon est de paix ou que les moiens de la guerre soient prestz de sortir du païs
7
les compagnies dordonnances de descharger ledit païs du tout des deniers de la subvention generalle
8
octroy impotz du vin et deniers demandés pour le voiage du roy de Pollogne ; plus davoir paiement
9
de la partie de XXVm livres prestées au roy par les ayses en lan 1567 ; de regler les nouveaux
10
officiers qui pretendent avoir privillège dexemption des tailles ; le faict des evocations et
11
celluy des pareatis ; le faict du sel pour avoir raison des restatz et deniers advancés pour
12
les gabelles et faire imposer silence aux procureur de sa majesté en la commission du sel
13
pour faire rendre à messieurs des comptes laudition du compte de la recepte generale ; revoquer
14
leedict des petiz seelz ; celuy aussi des procureurs ; rendre à la ville de Grenoble son
15
université ; donner moien à celle de Valence de refaire le mur que le Rosne a demoly et de
16
mesmes de celle de Romans pour rebastir la grande demolition que les eaux y firent
17
lan 1571. Je nay sceu avoir encor audience au conseil du roy, mais je vous puis
18
asseurer messieurs, que leurs majestés et tous les seigneurs dudit conseil, me lont donnée en
19
particulier telle quil nest poinct de besoing les en rechercher daventage. Mon cayer
20
feut leu par monsieur de Sauve devant le roy dans son cabinet lendemain que ledit
21
memoires de monseigneur de Gordes apportées par monsieur de Vennes y avoient esté
22
leues et feut trouvé que lesdits memoires et voz remontrances touchant lestat du païs
23
se rappourtoient et estoient conformes entierement. Je nay heu loisir de vous
24
en envoier la copie, encor que jen aye faict faire plusieurs que jay donné à messieurs
25
du conseil. Monsieur de Limoges ma dict aujourdhui que aussitost que monseigneur de
26
Montpensier seroit arrivé, que seroit pour le jour de demain, il fera son rapport dudit
27
cayer pour y faire promptement pourvoir, du moings ce quest de la conservation du païs
28
du IIIIme de ce mois, javois faict rapporter une requête contenant seulement trois chefz. Le
29
premier pour la subvention, le second pour les deniers pour le voiage du roy de Pollongne,
30
le troisième touchant a traicte obtenue par ceulx de Lyon laquelle feut respondu
31
que le païs auroit surcoyance encor jusques au mois de may prochain pour les deniers
32
des deux premiers chefz et que quant à ladite traicte, il seroit escript à monsieur
33
de Gordes pour donner advis si elle se debvoit permectre, mais je nay pas vollu
34
lever les provisions sur les decretz et response de ladite requête, actendant que sur le cayer
35
depuis presenté, le païs en doit du tout dechargé. Il ny a poinct encor darrest sur le
36
faict du sel, dautant que messieurs les commissères nont plus volu vacquer dès le commencement
37
de ce moys sans avoir argent et payement du roy. Le sieur de Montcal avoit retiré
38
des meins de monseigneur le chancellier larrest pour la blanque de Pecaix pour y
39
adjouster encor quelque article contre les proprietées, mais je le luy ay faict remectre
40
et expère en avoir bien tost expedition et de la declaration pour ne payer les gabelles
41
[v°] extraordinaires que pour le sel tiré. Je ne me suis pas donné beaucop de poyne pour faire
42
commectre ceulx qui defaillioient en la commission de bail de voitures, puis que
43
jay veu par votre dernière lettre quaussy bien tous messieurs les commis au faict du sel
44
alloient à Valence pour le compte du sire Jehan Bernard. Le sire François Rosset
45
et Marconis sont en ceste court pour leur appoinctement, mais ilz ne scavent bonnement
46
ce quilz en doivent experer pour trouver ledit sieur de Montcal du tout inconstant
47
et variable.
48
Il semble que lon crainct quelque nouvelle elevation et troubles ès provinces de
49
pardeça ; ce seroit pour eslonguer lordre que le roy promect donner aux affaires
50
de Daulphiné et de Languedoc et le divertir du propos où il est daller bien tost
51
à Lyon. Les dernières nouvelles que lon a du serenissime roy de Pologne, sont quil
52
est dans le païs de Saxe, qui est le plus dangereux à passer. Il y a icy
53
gens du Comtat qui empeschent que les compagnies dordonnances nentrent
54
dans ledit païs du Comtat et que monsieur de Suze ny autre y commande que
55
ceulx que le pape y a commis, toutesfois, le roy faict estat quelles
56
y entreront. Je nay poinct de nouvelles de mondit sieur de Gordes puis ma depeche
57
par monsieur le contrerolleur Lyonne sur ce poinct comme monsieur de Vennes [d’Evènes] a debattu
58
au roy que le Contat ne vouldroit pas recepvoir lesdites compagnies. Sa majesté
59
a soustenu que se feroient et quelle sen feroit croire. On a parlé quelques
60
jours dung grand retranchement qui se faisoit, tant sur la maison du roy
61
que sur les commissères et contrerolleurs es guerres et sur les compagnies dordonnances
62
et gens de pied et pour supprimer par mort tous offices créés puis le règne du
63
roy Lois XIIme. Il semble que lon prent autre advis et que lon ny tochera
64
pas encore. Monsieur de Maugeron estoit party du jourdhuy pour aller en Daulphiné
65
traicté de la paix avec les rebelles, mais on me vient de dire que le
66
roy la renvoye querir et que ce voiage est rompu. Vous aurés bien tost
67
nouvelles de ce que sordonnera sur notre cayer. On goutte fort la
68
plaincte des exemptz pour la taillhe et bien que je ne laye couché aux termes
69
seulement de voz memoires ; si nen a[-t-]on parlé plus advant. Je presente mes
70
très humbles recommandations à voz bonnes graces et prie Dieu, messieurs, vous donner
71
la sienne. De Poyssy, ce XVIme janvier 1574. Monsieur de Limoges a aussi
72le cayer de messieurs du clergé que le roy luy a semblablement remis duquel je [barré : kay ]
73
nay pas moings desing que de lautre. Votre humble et très affectionné serviteur.
74
S. de Boczosel. Et au dessus : messieurs messieurs les commis des estatz de
75
Daulphiné à Grenoble